As Sereas das Mirandas é o nome baixo o que se inscribe o primeiro
equipo galego de remo adaptado dirixido a mulleres que padeceron un
cancro de mama. A iniciativa centralízase no municipio de Ares e conta
co traballo coordinado do Concello da localidade, o Club de Remo e a
Universidade de Sevilla (US).
O equipo desexa converterse nun proxecto de rehabilitación física e
psicolóxica que bebe das investigacións realizadas polo doutor Juan
Gavala na US, amosando os beneficios que proporciona o deporte,
adaptando os exercicios, movementos e a intensidade ás particularidades
do cancro de mama.
OS BENEFICIOS
As Sereas das Mirandas baséanse nos resultados cuantificados e testados
no grupo de mulleres que integran as Leonas do Guadalquivir, xa con
varios anos de práctica deportiva de remo adaptado. Dende a Universidade
de Sevilla, a través dos estudos de Juan Gavala, expóñense os seguintes
beneficios:
1. Aumento da flexibilidade e a forza (incluso no brazo afectado pola ciruxía)
2. Mellora da composición corporal
3. Mellora da capacidade cardio-respiratoria
4. Mellora do estado anímico, da autoestima e da saúde mental
OS PRINCIPAIS OBXECTIVOS- PROMOVER O ACCESO Á PRÁCTICA DEPORTIVA: A partir dun conxunto de exercicios adaptados e debidamente
supervisados, é posible acceder ó remo e recuperar o deporte como unha
actividade fundamental no día a día. As Sereas das Mirandas queren botar
unha man facilitando o seu acceso.
- AXUDAR NO PROCESO DE RECUPERACIÓN DO CANCRO DE MAMA: A instauración dun hábito saudable como é o exercicio do remo reporta
unha considerable cantidade de beneficios que resultan claves na
recuperación de corpo e mente tras os tratamentos de quimio e
radioterapia.
- CONSTRUÍR UN ESPAZO DE APOIO: A elección dun deporte de equipo, colectivo, implica tamén ir moito máis
aló da mellora física: supón unha oportunidade para compartir
experiencias dentro dunha rede que aporta outros elementos distintos aos
que pode proporcionar un experto de remo ou oncólogo
- LOITAR CONTRA A ESTIGMATIZACIÓN DA DOENZA: A posta en marcha desta tipoloxía de proxectos conleva unha ruptura da
concepción tradicional do cancro de mama, a que precisamente impide
levar a cabo actividades en realidade factibles cunha correcta
supervisión e execución, como é o caso do remo.
- INSCRICIÓNS: Para sumarse ás Sereas das Mirandas, é preciso realizar unha inscrición previa vía telemática cubrindo o seguinte formulario: https://forms.gle/7fXemJApvSe22jxTA.
Despois da inscrición, contactarase coa persoa interesada para achegar
información sobre os seguintes pasos administrativos que deberá
realizar.
Os horarios para a práctica desta actividade durante o mes de agosto de
2022 serán os martes e xoves, de 10:00 a 13:00 horas, cun custe mensual
de 19,52 euros, segundo o prezo estipulado pola ordenanza municipal. De
igual maneira, necesitarase asociarse ao Club de Remo de Ares para a
participación no equipo.
Habilitaranse 15 prazas iniciais dentro das Sereas das Mirandas, dando
prioridade ás persoas que padeceron ou padezan algunha patoloxía
oncolóxica.
AUTORIZACIÓN DE IMAXES
A inscrición implica que o Concello poida difundir libremente a imaxe dos participantes nas actividades, sempre baixo unha utilización sen ánimo de lucro, co obxectivo de difundir e promocionar a programación municipal, intentando salvagardar a imaxe dos menores durante o seu funcionamento. Se non consinte a cesión dos dereitos de imaxe, pode facer a súa rectificación ou cancelación no correo electrónico deportes@concellodeares.com.
PROTECCIÓN DE DATOS
Seguindo o regulamento de protección datos persoais, as persoas solicitantes autorizan o tratamento dos datos facilitados polo Concello de Ares só cos fins asociados á xestión deste formulario. As persoas solicitantes poder exercer os seus dereitos de acceso, oposición, rectificación e cancelación dirixíndose ao correo deportes@concellodeares.com ou vía postal a Av. Saavedra Meneses 12 15624, Ares.