Напярэдадні Дня Роднай мовы Беларускі Дом запрашае беларусаў Польшчы і перадусім Варшавы, а таксама ўсіх неабыякавых да беларушчыны і беларускай мовы выказаць сваю пазіцыю, падтрымаць традыцыю, салідарызавацца з Беларуссю - і напісаць Нацыянальную дыктоўку разам. Гэтым разам тэкст будзе унікальным - дыктоўка будзе складзеная паводле лістоў нашых палітвязняў, самыя кранальныя і важныя фрагменты, якімі падзяліліся родныя і сябры нашых герояў.

Так сімвалічна мы распачынаем цыкл традыцыйных беларускіх мерапрыемстваў, прымеркаваных да нашых нацыянальных святаў і датаў памяці ў Беларускім Доме ў Варшаве.

Натхняльніца і вядоўца імпрэзы - літаратарка, паэт, аўтарка праграмы "Беларус беларусу" ВАЛЯРЫНА КУСТАВА.

Адмысловыя госці:

-  АЛЯКСАНДР МІЛІНКЕВІЧ - заснавальнік Руху "За Свабоду і "Вольнага беларускага універсітэту".
 - ЗМІЦЕР БАРТОСІК - легендарны беларускі бард, журналіст - разам са сваёй гітарай, новымі гісторыямі і старымі хітамі. Адбудзецца канцэрт!

Пераможцаў дыктоўкі чакаюць - прызы! А ўсіх прысутных - сяброўскі пачастунак. Таксама ў праграме інтэрактыўныя гульні, сюрпрызы і віктарына!
Сэнс і прыгажосць ідзеі перадусім у тым, каб зрабіць гэта разам, незалежна ад таго, будуць у вас памылкі ці не.

Сустракаемся: 20 лютага (нядзеля) а 14.00 у Беларускім Доме ў Варшаве (ul. Kryniczna 6).
Таксама просім памятаць пра бяспеку - і захапіць з сабой маскі.

Падтрымаем нашу Мову разам! Дзяліцеся падзеяй! Запрашайце сяброў! Адсвяткуем разам!