Сябры, у суботу 27 лютага напярэдадні дня народзінаў Менску Арт Вандроўня прапануе тым, хто ўжо перахварэў і не баіцца кавіду,  усё-такі  выбрацца ў недалёкую, але вельмі змястоўную выязную вандроўку па Меншчыне  з гісторыкам ды экскурсаводам Цімохам Акудовічам, што не сабралася ў кастрычніку.

Каля году таму ў Гарадзішчы - месцы заснавання летапіснага Менску каля магутных валоў Замчышча Х-ХІ стагодзяў вядомы журналіст і асветнік Глеб Лабадзенка заснаваў музей "Стары Менск", асновай якога сталі каля 500 экспанатаў Х-ХІ стагоддзяў, у тым ліку знойдзеных на раскопках Акадэміі навук. Прапануем разам завітаць у гэты музей, пахадзіць па магутных валах Менскага Гарадзішча, даведацца гісторыю яго заснавання і знішчэння, але перад гэтым павандраваць па наваколлі, па колішніх шляхецкіх сядзібах Меншчыны ды згадаць вядомых асобаў, што жылі ў гэтых месцах.

Маршрут вандроўкі: Менск  - Дзягільна - Баравое - Рубяжэвічы - Старынкі -  Койданава (Дзяржынск)- Вялікія Навасёлкі - Гарадзішча (+музей "Стары Менск") - Менск

Дзягільня - пахаванні роду Янушкевічаў, у тым ліку былога паўстанца, паэта, даследчыка Адольфа Янушкевіча, рэшткі іх маёнтка.

Баравое - капліца-пахавальня шляхецкага роду Дыбоўскіх (пач. 20 ст.) цікавай круглай формы

Рубяжэвічы - касцёл святога Юзафа пачатку 20 ст. (1907 – 1911 гг.) і ўнікальная экскурсійная цікавінка - каменная карта парафіі (музей валуноў у мініятуры)

Старынкі - маляўнічыя рэшткі былой уніяцкай, пазней праваслаўнай царквы Пятра і Паўла пачатку 19 ст. і магіла беларускага мастацтвазнаўцы-этнографа Міхася Раманюка (калі атрымаецца прайсці на могілкі).

Койданаў (Дзяржынск) - Замчышча (Кальвіншчына) - месца былога замка і кальвінскага збора і драўляны касцёл Святой Ганны (другая палова 18 – 20 ст.).

Вялікія Навасёлкі - Палац і гаспадарчыя будынкі маёнтку сям’і Кастравіцкіх (1820-30-я гг.). Магіла беларускага паэта Каруся Каганца (Казіміра-Рафала Кастравіцкага).

Гарадзішча (з музеем "Стары Менск") - замкавыя валы гарадзішча Х стагоддзя, на якіх быў заснаваны Стары Менск, зараз мае шмат мастацкіх цікавостак і аднойдзеныя пахавальныя пліты Рудольфа Пішчалы ды яго сям'і.

Больш падрабязна пра гэтую вандроўку вы можаце прачытаць у артыкуле Цімоха Акудовіча: https://34travel.me/gotobelarus/post/history-around-minsk

Але асноўная цікавінка Гарадзішча – Музей “Стары Менск”, які стварыў вядомы журналіст і асветнік Глеб Лабадзенка

Тут вы ўбачыце:

    500 экспанатаў Х-ХІ стагоддзяў, у тым ліку знойдзеных на раскопках Акадэміі навук проста пад вокнамі нашага музея.
    адзіны ў Беларусі макет Менскага замка ХІ стагоддзя;
    вялікага князя Усяслава Чарадзея ў цямніцы;
    самую старую ва Усходняй Еўропе шахматную фігуру — каня пачатку ХІ стагоддзя;
    вобраз Крыжа Еўфрасінні Полацкай у натуральную велічыню ды шмат чаго цікавага!

Запіс праз гэтую гугл-форму! Перад вандроўкай будзе паведамленая больш падрабязная інфармацыя. Калі ласка, калі пакідаеце е-мэйл, правярайце тэчку спам, лепш пакідаць 2 кантакты. За дзень да вандроўкі абавязкова пацвердзіць свой удзел!

Вандроўка плануецца на камфартабельным мікрааўтобусе, але замоўлены і вялікі аўтобус, калі збярэцца дастаковая колькасць людзей для аплаты якога, можна будзе зрабіць антыкавідную рассадку. Выезд у 8-30, вяртанне прыкладна каля 20-й гадзіны.

Унёскі для на вандроўку з экскурсіяй - 35 бел. руб. + квіток у музей 5 руб. з чалавека. Аплата наяўнымі ў аўтобусе, хто жадае загадзя аплаціць безнаяўнымі, пішыце ў viber.

Мікрык апрацоўваецца адмысловым антысептычным сродкам. У мікрыку і на арграсядзібе трэба апранаць маскі.

Уся дадатковая інфармацыя: 8-025-5458430 (viber), 8-044-5386283 (Валерыя), @liusterka (telegam), а таксама праз е-mail: bielkultura@gmail.com