我哋收集緊廣東話嘅語言材料嚟建立語料庫（corpus）。想揾大家跟住指定要求去續寫對話，7 分鐘左右就寫到一段。

［玩法］
① 喺我哋貼出嚟嘅句子入面，揀一句做對話嘅開場白。
② 續寫香港語境嘅對話。每段對話總共要有 10 句，即係 5 個來回，你只需要加多 9 句落去。

————— 續寫指引 —————

［內容方面］
• 續寫對話係創作嚟，冇對與錯，前提係貼近現實。可以想像下親友之間嘅對話，或者回憶返啲平日喺街聽到嘅對話。
• 無論咩語言，日常對話少不免夾雜粗口、潮語同外語，香港語境嘅粵語對白當然唔例外。續寫嘅對話可以加入呢啲詞彙，但唔需要刻意大量加插去令段對話更具「香港特色」。所謂香港文化 / 特色其實就係我哋嘅日常，貼近生活即可。
• 我哋提供嘅開首句子有分唔同主題，但係續寫嘅對話唔需要 100% 緊扣嗰個主題。例如畀你嘅第一句係「我阿姐今日又發神經」，續寫落去可以係環繞呢位上司、呢份工，亦可以喺中間轉移咗去其他話題。轉移話題可以由「阿姐發神經 → 燥底中女 → 更年期 → 女人保養 → 養生花茶 → 新開 cafe」噉嘅方向自然地改變，亦可以由其中一方用言語（例如：「唔好講佢喇，畀啲嘢你睇。得唔得意呀？」）直接過渡。

［格式 / 選字方面］
• 標點符號用全形，拉丁字母同阿拉伯數目字用半形。
• 區分「噉 gam2 / 咁 gam3」、「喺 hai2 / 係 hai6」。
• 盡量區分埋「地 / 哋」、「既 / 嘅」、「野 / 嘢」、「黎 / 嚟」、「訓 / 瞓」etc。
• 有啲粵語詞可能有幾個常見寫法，例如「畀 / 俾」、「噚晚 / 尋晚 / 琴晚」、「黐線 / 痴線」、「屌 / 𨳒」。唔需要特別考究所謂本字，揀常見常用嘅就得。可以參考《粵典》收錄嘅寫法。