Сябры, у нядзелю 18 ліпеня Арт Вандроўня cупольна з Фондам Еўфрасінні Полацкай прапануе Вам далучыцца да вандроўкі "У Бярэзінскі біясферны запаведнік". Вядоўца вандроўкі - цудоўны гісторык, музейшчык ды экскурсавод Павал Каралёў.
Маршрут вандроўкі: Менск - Жардзяжжа - Бягомль - Бабцы - Бярэзінскі біясферны запаведнік - Лепель - Менск.
Напачатку мы пад'едзем да вёскі Жардзяжжы, дзе на могілках захавалася цікавая каплічка-пахавальня 1860 года пабудовы ў стылі класіцызму. Паспрабуем разгадаць таямніцу яе ўладальнікаў.
У Бягомлі мы пачуем пра розныя варыянты паходжання назвы гарадскога пасёлка, і як ён ледзь за часамі Машэрава не стаў "Партызанскам". Пабачым царкву Усіх Святых (19 стагоддзя). І дазнаемся пра дзейнасць мясцовага партызанскага аэрадрома падчас вайны. Нездарма ў Бягомлі пастаўлены помнік самалёту.
Каля невялікай вёсачкі Бабцы зберагліся больш за 20 унікальных каменных крыжоў. Некаторыя з іх большыя за чалавечы рост. Месца таямнічае і прыгожае. Нездарма Рыгор Барадулін пакінуў такія радкі:
У лесе, у зялёнай імжы
Затоеныя вякамі
Каменныя стынуць крыжы
З адсечанымі рукамі.
Калі багоў даўніны
Расьцілі –
Адцялі рукі,
І сталі крыжамі яны,
Сакральныя помнікі-рухі.
Тут часу зацішна яшчэ.
Зьбіраюцца здані з адхонаў.
І камень сьцюдзёна пячэ
Сузор’е паганскіх пісьмёнаў.
Галоўная мэта нашай вандроўкі - Бярэзінскі Біясферны запаведнік. Мы дазнаемся, чаму ён абавязаны свайму стварэнню бабрам, бо дзеля ўратавання іх папуляцыі і стварылі запаведнік. Мы пройдземся мясцовай экасцежкай, наведаем лясны заапарк і па жаданні, музей прыроды. Непадалёку размяшчаецца Музей міфалогіі - месца правядзення фестываля "Міфы на балоце". А яшчэ ў запаведніку знаходзіцца траціна папуляцыі мядзведзяў. Маюцца свае зубры, і нават больш дзікія чым у Белавежскай пушчы.
У Лепелі мы ўбачым касцёл святога Казіміра 19 стагоддзя. Падыйдзем да помніка Льву Сапегу, якому у 16 ст. належылі вакольныя землі. Дазнаемся і пра мясцовага цмока, якога увекавечылі ў бронзе ў 2013 годзе. На помніку ён дужа мілы, адпаведна вельмі прыемна будзе з ім сфоткацца. А славу цмоку ў Лепелі прынес пісьменнік Уладзімір Караткевіч. Таксама дазнаемся пра назвы Стары Лепель, Белы Лепель і Новы Лепель. І вядома, можна будзе адпачыць на лепельскім пляжы, даць нырца ў знакамітае лепельскае возера, каб паспрабаваць злавіць тутэйшага цмога за хвост, ці проста атрымаць асалоду ад сузірання мясцовых краявідаў. Напоўніцу адчуем, што Лепель - шыкоўнае месца для адпачынку.
Запіс праз гэтую гугл-форму! Перад вандроўкай будзе паведамленая больш падрабязная інфармацыя. Калі ласка, калі пакідаеце е-мэйл, правярайце тэчку спам, лепш пакідаць 2 кантакты. За дзень да вандроўкі абавязкова пацвердзіць свой удзел!
Спадзяемся, што вандроўка адбудзецца на вялікім аўтобусе з антыкавіднай рассадкай, але калі не набярэцца вялікі, можам паехаць і ўтульным мікрыкам. Выезд а 8-й, вяртанне прыкладна прыкладна а 22-й.
Унёскі для на вандроўку з запаветнай сцяжынкай ды ўваходам у лясны заапарк у Бярэзінскім - 60 бел. руб. (без Бярэзінскага 48 руб.) - наяўнымі ў аўтобусе ці загадзя ў Фонд. Асобна па жаданні аполчваецца абед.
Паколькі ўсе актыўнасці ў Бярэзінскім біясферным запаведніку аплочваюцца асобна, просім Вас адказаць на пытанне, ці жадалі б вы за асобную плату ў 6 руб. наведаць Музей прыроды. Калі большасць групы будзе жадаць, мы вылучым на гэта час!
Запіс праз гэтую гугл-форму! Перад вандроўкай будзе паведамленая больш падрабязная інфармацыя. Калі ласка, калі пакідаеце е-мэйл, правярайце тэчку спам, лепш пакідаць 2 кантакты. За дзень да вандроўкі абавязкова пацвердзіць свой удзел!
Аўтобус апрацоўваецца адмысловым антысептычным сродкам, абавязкова апранаць маскі.
Уся дадатковая інфармацыя: 8-025-5458430 (viber), 8-044-5386283 (Валерыя), а таксама праз е-mail:
bielkultura@gmail.com