Cябры, на выходныя 19-20 чэрвеня ёсць новая прапанова для вандроўніцкага клюбу Арт Вандроўня ад арганізатараў байдаркавых сплаваў: 2-хдзённая вандроўка + сплаў па Вяллі для пачаткоўцаў.
Маршрут наступны: Менск - Плябань – Краснае – (Маладзечна) – Беніца – Залессе – Смаргонь (на мікрыку) + Данюшава (на байдарках, начаванне ў намётах) і Жодзішкі (на байдарках) - Менск (вяртаньне на мікрыку)
Для ўдзелу ў вандроўцы ці зусім непатрэбны ці патрэбны мінімальны досвед паходу на байдарках - будуць дасведчаныя інструктары, якія акрамя іншага збяруць лодкі і згатуюць ежу. Начаванне ў намётах (палатках). Для тых, хто заўсёды марыў пра байдарачны паход, але ўсё ніяк не мог вырашыцца - найлепшы шанец.
Па маршруце:
- У Плябані мы пабачым Успенскую царкву, былы касцёл, што выкарыстоўваўся паўстанцамі 1863 года ў якасці таемнага арсенала, а таксама помнік на магіле паўстанцаў.
- У Красным наведаем цудоўны неагатычны касцёл Унебаўзяцця Найсвяцейшай Панны Марыі, які ніколі не зачыняўся. У савецкі час гэта быў адзіны дзейсны каталіцкі храм у Менску і ваколіцах.
- Каля вёскі Мясата мы ненадоўга спынімся каля памятнага знака "Віленскі шлях", які быў пастаўлены яшчэ ў 1979 г. і згадвае шмат вядомых асобаў, што ў свой час праязджалі гэтым шляхам у тагачасную сталіцу края Вільню.
- У Маладзечне мы пабачым рамантычны помнік Міхалу Клеафасу Агінскаму ля музычнага каледжу імя кампазітара.
- У Беніцы агледзім велічны помнік позняга барока – касцёл Найсвяцейшай Троіцы;
- Адзін з асноўных пунктаў нашай праграмы – сядзіба ў Залессі, дзе наш знакаміты кампазітар, дыпламат і палітычны дзеяч Міхал Клеафас Агінскі пражыў каля 20 гадоў. Менавіта ў гэты час Залессе стала вядомае як Паўночныя Афіны. Вакол палаца яшчэ і зараз захаваліся рэшткі парка ў англійскім стылі і сажалкі, а на тэрыторыі палацава-паркавага комплексу былі адноўленыя альтанкі ды знойдзеныя ўсталяваныя ў свой час самім Агінскім памятныя валуны свайму гувернёру Жану Рале ды духоўнаму настаўніку Тадэвушу Касцюшку. І, вядома, нас чакае сам палац Агінскіх, адноўлены некалькі год таму да 250-цігадовага юбілея Міхала Клеафаса. Па жаданні вы зможаце наведаць адноўленыя інтэр'еры палаца і цудоўную музейную экспазіцыю.
- Асноўнай славутасцю мястэчка Смаргонь з'яўляецца былы кальвінскі збор пачатку 17 ст., а цяпер касцёл Святога Міхаіла Арханёла, а таксама велізарны Спаса-Праабражэнскі сабор, адноўлены на месцы знішчанага праваслаўнага храма. У прыгожым маляўнічым парку сярод іншых цікавостак ёсць помнік знакамітаму беларускаму пісьменніку Францішку Багушэвічу, які меў маёнтак непадалёк ў вёсцы Кушляны. Тут мы таксама наведаем мемарыяльны комплекс памяці герояў і ахвяраў Першай сусветнай вайны ці па жаданні – цудоўную экспазіцыю мясцовага смаргонскага краязнаўчага музею, дзе мы даведаемся пра асноўныя славутасці Смаргоні – мядзвежую Акадэмію і смаргонскія абаранкі!
- У вёсцы Данюшава, дзе мы будзем ночыць, нас чакае найцікавейшы драўляны касцёл Святой Тройцы, які быў пабудаваны напачатку 19 ст. На мяжы з 20-м тэрыторыя вакол касцёла была акружана каменнай агароджай, упрыгожанай цаглянай брамай, а таксама ў гэты час была пабудаваная званіца. Яшчэ тут захаваўся помнік загінулым нямецкім салдатам Першай сусветнай вайны. А арган у касцёле быў перавезены сюды з самой Вострай Брамы ў Вільні.
- Напрыканцы сплаву нас будзе чакаць самы далёкі пункт нашай вандроўкі – колішняе мястэчка Жодзішкі, праз якое праходзіў стары водны шлях у Вільню. Там захаваўся касцёл Найсвяцейшай Троіцы, былы кальвінскі збор XVII ст., а таксама палац XIX ст. і амаль 250-цігадовы вадзяны млын з адноўленым і працоўным аўтэнтычным механізмам.
Млын XVIII стагоддзя Жодзішках з'яўляецца адзіным дзеючым старадаўнім вадзяным млыном на тэрыторыі Беларусі: адрэстаўраваны і меле муку жорнамі з дапамогай вады. Адначасова у будынку млына размешчаны этнаграфічны музей ды музей збожжа і хлеба.
Запіс праз гэтую гугл-форму! Перад вандроўкай будзе паведамленая больш падрабязная інфармацыя, у тым ліку - дакладныя інструкцыі па падрыхтоўцы і зборы рэчаў. Калі ласка, калі пакідаеце е-мэйл, правярайце тэчку "спам", лепш пакідаць 2 кантакты. За дзень да вандроўкі абавязкова пацвердзіць свой удзел!
Унёскі на вандроўку - 130 руб. з чалавека, у якія ўваходзяць:
- праезд на мікрыку ў два бакі;
- пракат байдарак;
- згатаваная па-паходнаму ежа (2 абеды, вячэра і сняданак);
- інструктаж і дапамога на сплаве;
- уласна экскурсія.
Дадаткова:
5 руб. - месца ў намётах, калі няма свайго намёта (палаткі).
Квіткі па жаданні ў музей Агінскага ў Залессі і ў смаргонскі музей, а таксама працуючы водны млын-музей у Жодзішках.
Пры наяўнасці ўласнай байдаркі - унёскі 100 бел. руб.
Уся дадатковая інфармацыя: 8-025-5458430 (viber), 8-044-5386283 (Валерыя), а таксама праз е-mail:
bielkultura@gmail.com, па пытаннях уласна сплаву 8-029-1589263 (viber, Таццяна)