Għażiż/a Kap tal-Iskola

Kif tħabbar dan l-aħħar, il-Malta Union of Teachers qiegħda taħdem sabiex terġa’ tibda tippubblika r-rivista "Sagħtar" mis-sena skolastika li jmiss (2020-2021). Din id-darba r-rivista, filwaqt li se jkollha l-verżjoni stampata bħal qabel, se tkun imsaħħa u miżjuda bil-format diġitali. Qiegħed isir minn kollox biex ir-rivista tkun ta’ kwalità u bħalissa qegħdin nikkunsidraw ukoll jekk ikunx possibbli li r-rivista titqassam bla ħlas. Jekk dan iseħħ, fl-ewwel sena qegħdin inħarsu lejn il-possibiltà li din tingħata lill-istudenti bejn il-Year 4 u l-Year 6. Għalhekk qegħdin nitolbukom tagħtuna indikazzjoni ta’ kemm huwa previst li jkun hemm studenti ta’ dawn l-etajiet interessati li jirċievu s-“Sagħtar” fis-sena skolastika li jmiss, billi tieħdu minuta u timlew din il-formola. Dan l-eżerċizzju jgħinna ħafna biex innaqqsu l-ħela kemm jista’ jkun u nimminimizzaw l-ispiża tal-pubblikazzjoni.

Apparti dan nixtiequ nuru x-xewqa li s-"Sagħtar" ikollu involviment qawwi mill-iskejjel. Attivitajiet, proġetti, kitbiet tat-tfal u inizjattivi oħra fl-iskejjel ikun sabiħ li jiġu ċċelebrati fir-rivista. Għaldaqstant l-appell tagħna hu li għalissa taħsbu ftit dwar kif ir-rivista tista' tgħin lill-iskola, l-edukaturi u l-istudenti sabiex flimkien noħolqu rivista li tkun verament speċjali. Jekk diġà għandkom xi ideat nitolbukom tinkluduhom fil-formola wkoll. Ma' dawn tistgħu żżidu x'kontenut kieku tieħdu gost li taraw fir-rivista għall-etajiet li semmejna. Din tgħinna sabiex naraw li kemm jista' jkun ma nsejna xejn.

Din il-formola għandha timtela sal-Ġimgħa, 20 ta' Marzu 2020.

Nirringrazzjawkom ħafna.