Младински образовен форум и Радио МОФ ве покануваат да го проследите четвртото издание на „(Из)вонредни проекции“. Секоја недела од месец мај, на платформата за видео комуникација – Zоom, МОФ и Радио МОФ организираат заедничко гледање на проекции на македонски краткометражни филмови, во придружба на режисерите и дел од екипата која работела на филмовите.

На 31-ви мај (недела) 2020 година, во 19:00 часот, наместо да ја бинџате истата серија по навика, придружете ни се на четвртата (Из)вонредна проекција на ZOOM да ги проследиме краткометражните филмови „Елена“ и „Без љубов“ на режисерката Дина Дума.

По проекцијата, која публиката ја гледа од дома, следи виртуелна интерактивна Q&A сесија со режисерката Дина Дума, која ќе ги открие тајните позади овие две филмски остварувања, инспирацијата и предизвиците кои ги носи снимањето.

„Елена“ е филм за една стара жена која страда од деменција, мисли дека има дваесет години и дека ќе избега со својот љубовник. Филмот ја следи нејзината приказна и како ова влијае на нејзиниот син.

Краткометражниот филм „Без љубов“ го следи пресвртот на едно пријателство. Ана и Марта се најдобри другарки од деца. Денот пред свадбата на Ана, одлучуваат да го поминат заедно, во викенд куќата покрај езерото каде оделе кога биле мали. По неочекуваниот “пијан бакнеж” од страна на Марта, другарките се соочуваат со фактот дека нивното другарство никогаш повеќе нема да биде исто и дека некои работи е подобро засекогаш да останат некажани.

Откако ќе се пријавите на овој формулар, ние ќе ви испратиме линк од Zoom на вашиот e-mail.
За првите 10 пријавени, седиште во првите редови 😉

Цикулусот (Из)вонредни проекции се организира во склоп на проектот Ангажирање на младите за студентски и младински политики, поддржан од Фондација Отворено општество-Македонија.