БСШУС-ийн сайдын 2018 оны 476 дугаар тушаалаар ЕБС -ийн орчин дахь хүүхэд хамгааллын бодлого батлагдсан. Улмаар тус бодлогын хэрэгжилтэнд дэмжлэг үзүүлэх үүднээс 2019 онд ЕБС-ийн орчин дах хүүхэд хамгааллын бодлогыг хэрэгжүүлэх зөвлөмж гарч, Сургалтын цөм хөтөлбөрт дэмжлэг үзүүлэх арга зүй үндэсний сургалтын хүрээнд бүх сургуулийн захирал, нийгмийн ажилтнуудад зөвлөмжийн дагуу сургалт явагдсан билээ.
Бодлого батлагдснаас хойш 2 жилийн хугацаа өнгөрч буйтай холбоотойгоор ЕБС-ийн Хүүхэд хамгааллын бодлогын хэрэгжилтийн байдлыг судалж, цаашид авах шаардлагатай арга хэмжээний санал боловсруулах үүднээс МУБИС-ийн НААЗТ-ийн багш нарын баг БСШУСЯ -ны захиалгаар Дэлхийн Зөн ОУ-ын байгууллагын дэмжлэгтэйгээр тус судалгааг улсын хэмжээнд нийт сургуулийг хамруулан явуулж байна. Судалгаанд сургуулиа төлөөлөн сургуулийн нийгмийн ажилтнууд оролцон, өөрийн сургуулийн орчинд хүүхэд хамгааллын бодлогын хэрэгжилт ямар байгаа талаар үнэлгээ өгөх юм.
Тус судалгааны хүрээнд цуглуулах мэдээлэл нь Боловсролын салбар дах Хүүхэд хамгааллын бодлогыг үнэн бодитой үнэлэхэд чухал ач холбогдолтой суурь мэдээлэл болох тул та бүхнийг аль болох бүрэн дүүрэн хариулт өгч, үнэн зөв мэдээлэхийг хүсэж байна. Судалгааны хүрээнд цугласан мэдээллийн нууцлалыг бүрэн хангаж ажиллах ба судалгааны хүрээнд өгсөн мэдээлэл нь таны болон танай сургуулийн ажлын амжилт, чанарыг үнэлэхэд ашиглагдахгүй юм.
Иймд та бүхнийг энэ судалгаанд цаг зав гарган оролцож, судалгааны асуултуудад үнэн зөв, бүрэн дүүрэн хариулт өгөхийг хүсье.
Судалгааны мэдээллийг 3 сарын 22-ныг дуустал цуглуулна. Та бүхэн судалгаатай холбоотой асуудлаар
bulganzaya@msue.edu.mn хаягаар холбогдож болно.
Та бүхэнд маш их баярлалаа.
Жич: Хэрвээ энэ судалгааны талаар мэдээгүй сургуулийн нийгмийн ажилтныг мэдэж байвал энэ талаар мэдээлж тусална уу. Орон нутгийнхаа сургуулийн нийгмийн ажилтнуудын нийгмийн сүлжээний группт судалгааны холбоосыг нийтэлж болно.