如何教育出齊備台灣文化自信，閣有國際視野的後一代，一直是真濟台灣爸母關注的議題。目前的雙語政策大手面提升台灣的英語教育資源，毋過根據調查，咱台灣在地的語言煞當咧急速流失。踮佇「也在地也國際」的教育目標之下，政府應當做閣較適當的語言資源配置。
2022年文化部公布的「國家語言發展報告」中顯示，有86%的家長，其實是向望囝兒序細會當向𪜶學習母語。閣再仝一个調查嘛顯明，較無11歲的囡仔干焦有2成比例會曉講母語。
現前欠缺旺盛的本土語言環境，學校支援又閣不足的情形下，濟濟少年爸母真僫得予囡仔學會曉家己的母語，阿公阿媽佮孫仔三代的溝通語言嘛干焦會當敧倚華語，這款的現象，嚴重阻礙囡仔培養文化自信的可能。
台灣目前猶咧使用的本土語言超過30種，民眾嘛普遍猶有多語的能力，遮爾豐富的文化佮語言資產，煞無得著政府有夠額的重視。獨尊華語的語言政策，造成台灣當咧行向「語言單一化」的處境，深深影響人民佮學校對語言教育的想像。
社會資源、醫療照護的語言資源，閣較因為照護、服務人員的世代交替，大量集中對華語去，致到序大僫得用自在的語言溝通。欲愛改善這个現象，語言教育定著愛綴咧調整。
現前，政府已經投入真大注的資源佇英語方面，各級學校攏咧積極推動，阮衷心期望佇本土語言這部分，嘛會用得同步強化，予囡仔的語言教育有閣較健全的發展。
根據媒體報導，苗栗的僑育實驗小學，這兩冬實施客英雙語教育，校方對多元智能的角度，鼓勵學生靈活運用無仝語言，毋但學生的學習反應真好，想欲送囡仔去讀的家長是濟甲窒倒街。通知多語的學習環境，對學生、對家長攏有明確的好處佮吸引力。
阮向望各縣市的縣市長參選人，未來佇教育佮社會政策頂頭，嘛會用兼顧台灣本土價值與國際視野，毋但為母語囡仔，嘛為所有學生、家長佮市民，打造閣較語言友善佮文化融合的教育和生活環境，落實「國家語言發展法」中，「語言平權」以及「多元文化」的精神，予各縣市的校園佮社會，通得親像語言學者Garcia所描述的，成做「百花齊開的語言花園」。
根據以上，阮欲提出以下三大面向攏總十一點訴求：
一、學齡前：應以培育、健全幼兒的母語意識為主。
二、學齡後：提供學童多語智能佮多元文化的教育師資與課程。
各縣市各級學校每學年愛舉辦一場本土語言意識培訓課程。
積極推動各縣市小學申請本土語言浸汰計畫，而且明訂期程目標。
積極提供申請浸汰計畫的校方佮教學人員具體獎勵以及補助，並且設立推動目標。
推動各縣市教師考證（本土語言專業）比例，建構專業師資人才庫。
各縣市各區小學至少開設一班以台語做教學語言（通配搭其他語言）的授課班，並且規劃成立台英雙語抑是多語智能學校的具體時程。
三、社會環境面：增加一般大眾本土語言活動的可近性佮多元選擇，並且建構樂齡者母語照護制度，打造社會全面的多語友善空間。
各縣市政府應成立母語共學基地，定期提供母語活動、課程，並且成做母語家庭佮民間團體共學、交流的場所。
各縣市立文教場所如圖書館、親子館等，應增加以本土語言進行的親子或是教育活動。
鼓勵各縣市藝文人士佮團體以本土語言進行表演，並且提供具體補助或是獎勵。
各縣市府應推動「母語照護人員」制度，提供使用本土語言的照護人員補助或是獎勵，予蹛佇本市的樂齡者，通得著閣較安適的母語照護服務。
阮是一陣綿精咧推動台語傳承佮推廣的家長以及民間團體，期待透過行動，啟發大眾的語言意識，促成更加語言友善的社會。假使恁認同阮的訴求，歡迎參與連署。這份政策連署書將佇選舉前陸續公布連署成果，並且期望得著各縣市參選人的具體承諾。
邀請你，同齊為台灣的多語友善校園佮社會願景來拍拚。
侯選人(繼續咧更新)
連署團體 (繼續咧更新)
