Á skóla- og/eða fristundastarfið þitt skilið hrós? Eða veistu um verkefni sem á skilið að fá hrós og hvatningu?
Skóla- og frístundaráð Reykjavíkurborgar efnir til hvatningarverðlauna fyrir verkefni sem unnin eru í skóla- og frístundastarfi borgarinnar. Verðlaunin eru veitt fyrir níu verkefni ár hvert.
Markmiðið er að vekja athygli á því gróskumikla skóla- og frístundastarfi sem fram fer á vegum Reykjavíkurborgar. Verðlaunin eiga að veita starfsfólki jákvæða hvatningu og stuðla að nýbreytni og þróunarstarfi. Verðlaunin eru viðurkenning á vel unnu verki í þágu barna og foreldra og staðfesting þess að starfið sé fyrirmynd annarra á því sviði sem um ræðir.
Allir geta tilnefnt til hvatningarverðlaunanna:
Foreldrar, aðrir ættingjar, börn, starfsmenn, leik- og grunnskólar, frístundamiðstöðvar, samtök og stofnanir. Tilnefna má nýbreytni- og þróunarverkefni um hvaðeina í skóla- og frístundastarfi á vegum Reykjavíkurborgar, verkefni hópa eða einstaklinga er átt hafa frumkvæði að góðu starfi sem er öðrum til hvatningar, einnig verkefni tengd stefnumótun og skipulagi, foreldrasamstarfi eða öðru samstarfi.
Allar nánari upplýsingar á netfanginu sfs@reykjavik.is