Беларускія жанчыны часта сутыкаюцца з бар'ерамі, спрабуючы прыстасавацца да жыцця ў новай краіне. Часам мы не адчуваем дастатковай сілы, каб разабрацца з уладкаваннем новага свету, у якім мы апынуліся. Нам здаецца, што гэты сьвет нас не прымае і ў ім няма для нас месца.
Мы адчуваем выгаранне, дэпрэсію. Здаецца, што ў нас менш магчымасцяў знайсці высокааплатную працу і пабудаваць кар'еру, чым у мужчын.
Каманда Беларускага Моладзевага Хаба прапануе жанчынам неабходную падтрымку на шляху да незалежнасці. Мы распачынаем праграму падтрымкі для жанчын з Беларусі, якія спрабуюць уладкаваць сваё жыццё ў Польшчы.
У межах праграмы адбудуцца сустрэчы з псіхолагамі, экспертамі па кар'ерным развіцці, медыкамі, а таксама пройдуць заняткі па самаабароне. Сустрэчы пройдуць на беларускай і рускай мовах.
У наведвальніц сустрэч будзе магчымасць трапіць на паглыбленую праграму адаптацыі з абмежаванай колькасцю ўдзельніц. Кожная з удзельніц паглыбленай праграмы пройдзе курс індывідуальнай тэрапіі ў крызіснага псіхолага, курс польскай мовы, атрымае персанальную кансультацыю па кар'ерным росце, а таксама прыме ўдзел у Інтэграцыйным Дні.
Заняткі будуць праходзіць з 14 верасня 2022 па 31 студзеня 2023 года ў Варшаве ў Беларускім Моладзевым Хабе (Plac Konstytucji 6).
Мы папярэджваем, што запаўненне заяўкі не гарантуе ўдзелу ў паглыбленай праграме!
Калі ў вас узнікнуць пытанні, напішыце каардынатарцы праекта Стасі Гліннік на stasia@bmhub.org альбо патэлефануйце нам на +48 727 888 800.
Праект рэалізуецца пры фінансавай падтрымцы амбасады Канады ў Польшчы.