கல்லூரி கடந்து வந்த பாதை :
வான விரிவைக் காணும்போ தெல்லாம் .- உமா
மகேக்சுரன் புகழேஎன் நினைவில் வரும்
ஆன தமிழ்க் கல்லூரி நிறுவினோன் – மக்கள்
அன்பினோன், அறத்தினோன் ஆன்ற அறிவினோன்
பெற்ற அன்னையை அன்னாய் என்றுவாய்
பெருக அழைக்கவும் நேரமே யில்லை
உற்றார் உறவினர்க் காக உழைக்க
ஒருநாள் ஒருநொடி இருந்ததே இல்லை
கற்றவர் தமிழர் என்னுமோர் உயர்நிலை
காண வேண்டி இல்லந் துறந்து
முற்றுங் காலத்தைத் தமிழ்த் தொண்டாக்கினோன்
வாழ்க தமிழ் முனிவன் திருப்பெயர்
என்னும் பாவேந்தர் பாரதிதாசன் அவர்களின் கவிதை வரிகள், கரந்தைத் தமிழ்ச் சங்கத்தின் முதற்றலைவர் செந்தமிழ்ப் புரவலர் தமிழவேள் த.வே. உமாமகேசுவரனார் அவர்கள் தமிழ் மொழிக்காகவும், தமிழர்தம் முன்னேற்றத்திற்காகவும் ஆற்றியுள்ள பணிகளை அனவருக்கும் எளிதில் உணர்த்தும் வல்லமை வாய்ந்தவை.
அன்றைய நாளில் தமிழும், சமஸ்கிருதமும் கலந்த பேச்சு நடையே வழக்கில் இருந்தது. தூய தமிழில் பேசுதல் இழிவாகக் கருதப்பெற்ற அக்காலத்தில், தூய தமிழ் நடையாம் கரந்தை நடையை அறிமுகப் படுத்தியது கரந்தைத் தமிழ்ச் சங்கமாகும்.
இன்று திரு, திருமதி, செல்வன், செல்வி, திருமண அழைப்பிதழ் என்னும் பல தூய தமிழ் வார்த்தைகளை நாம் பயன்படுத்தி வருகின்றோம். அன்றைய நாளில் வழங்கிய ஸ்ரீமான், ஸ்ரீமாட்டி, விவாக சுபமுகூர்த்தப் பத்திரிக்கை போன்ற சொற்களுக்குப் பதிலாக திரு, திருமதி, செல்வன், செல்வி, திருமண அழைப்பிதழ் முதலிய தூய தமிழ்ச் சொற்களை அறிமுகப் படுத்தியது கரந்தைத் தமிழ்ச் சங்கமாகும்.
நீராருங் கடலுடுத்த எனத் தொடங்கும் மனோன்மணீயம் சுந்தரம் பிள்ளை அவர்களின் பாடலைத் தமிழ்த் தாய் வாழ்த்தாக அறிமுகப் படுத்தியது கரந்தைத் தமிழ்ச் சங்கமாகும்.
வடமொழி மட்டுமே கற்பிக்கப் பட்டு வந்த திருவையாற்று கல்லூரியில் தமிழையும் கற்பிக்கச் செய்து, அக்கல்லூரியின் பெயரை அரசர் கல்லூரியாக மாற்றியது கரந்தைத் தமிழ்ச் சங்கமாகும்.
தமிழ் மொழியினைச் செம்மொழியாக அறிவிக்க வேண்டும் என்று 1919 ஆம் ஆண்டிலேயே முதன் முதலாகத் தீர்மானம் நிறைவேற்றியது கரந்தைத் தமிழ்ச் சங்கமாகும்.
தமிழுக்குத் தனியே ஓர் பல்கலைக் கழகம் வேண்டும் என்று 1922 ஆம் ஆண்டிலேயே முதன் முதலாகத் தீர்மானம் நிறைவேற்றியது கரந்தைத் தமிழ்ச் சங்கமாகும்.
இந்தி மொழியைக் கட்டாயப் பாடமாக்கியபோது, 1937 ஆம் ஆண்டிலேயே அதன எதிர்த்து முதல் குரல் கொடுத்ததும், தீர்மாணம் இயற்றி களத்தில் இறங்கிப் போராடிய முதல் அமைப்பும் கரந்தைத் தமிழ்ச் சங்கமாகும்.
இத்தகு பெருமை வாய்ந்த, கரந்தைத் தமிழ்ச் சங்கத்தின், ஒரு பெருமைமிகு அங்கமாய், 1941 ஆம் ஆண்டு தொடங்கப் பெற்று, கடந்த 79 ஆண்டுகளாக, அயரா பணியாற்றிவரும், கல்வி நிறுவனம்தான், தமிழவேள் உமாமகேசுவரனார் கரந்தைக் கலைக் கல்லூரியாகும்.
அன்றைய நாளில் தமிழும், சமஸ்கிருதமும் கலந்த பேச்சு நடையே வழக்கில் இருந்தது. தூய தமிழில் பேசுதல் இழிவாகக் கருதப்பெற்ற அக்காலத்தில், தூய தமிழ் நடையாம் கரந்தை நடையை அறிமுகப் படுத்தியது கரந்தைத் தமிழ்ச் சங்கமாகும்.
