Məlumat üçün bildirmək istərdik ki, peşə təhsili üzrə qeyri-formal və informal təhsil formaları vasitəsilə əldə edilmiş səriştələrin tanınması Azərbaycan Respublikasının Nazirlər Kabinetinin 2020-ci il 5 avqust tarixli 279 nömrəli qərarı ilə təsdiq edilmiş “Vətəndaşların peşə təhsili üzrə qeyri-formal və informal təhsil formaları vasitəsilə əldə etdikləri bilik, bacarıq, səriştə və təcrübənin qiymətləndirilməsi və tanınması məqsədilə imtahanın keçirilməsi və onlara peşə ixtisasını təsdiq edən sənədin verilməsi Qaydası” əsasında Təhsildə Keyfiyyət Təminatı Agentliyi tərəfindən həyata keçirilir.
Sözügedən fəaliyyətə uyğun olaraq, Agentlik tərəfindən qeyri-formal və informal yollarla əldə edilmiş səriştələrin tanınması məqsədilə qiymətləndirmə və tanınma prosesi təşkil olunur. İmtahan nəticələri qənaətbəxş olaraq qiymətləndirilən müraciətçilərə Agentlik tərəfindən müvafiq olaraq sertifikat və ya diplom təqdim edilir. Qiymətləndirmə və tanınma prosesinin həyata keçirilməsi üçün maraqlı tərəflərə (dövlət və özəl sektoru təmsil edən işəgötürənləri) əməkdaşlıq imkanı təklif edirik!
Əlavə sualınız yarandığı halda qfitt@tkta.edu.az elektron poçtuna sorğu göndərməyiniz xahiş olunur.
