Tät kõõjjõs lij vueʹss Aanar kååʹdd čõõđtam nuõrttsääʹmǩiõl da kulttuur jeälltummuž ouddčiõlǥtõshaʹŋǩǩõõzz. Tän haʹŋǩǩõõzz täävtõssân lij noorrâd teâđ sääʹmõutstõõzzi taarbin nuõrttsääʹmǩiõl da kulttuur jeälltummuša da plaaneed tõi vuâđđald tåimmʼmõõžž pueʹtti määŋgekksaž haʹŋǩǩõõzz vääras. Teäggtõõzz haʹŋǩǩõõzz čõõđtummša ooccâp čâhčča 2023 Interreg Aurora -prograammâst.
Jeälltummuš-saaʹnin tän kõõjjõõzzâst juuʹrdet puk tååimaid, kook vuäiʹtte viikkâd ǩiõl da/leʹbe ǩiõl õõʹnnʼji lâssnummša da kulttuur tobddmõõžž di intreess šõddmõʹšše. Jeälltummuš miârkkšââvv âʹte pukid kuånstid, kook vuäiʹtte vieʹǩǩted nuõrttsääʹmǩiõl da kulttuur seeiʹltummšest, tuärjjummšest, tuõʹllʼjummšest, ooudâsviiǥǥmõõžžâst da oouʹdummšest.
Smeʹllkâʹttep säʹmmlaid vaʹstteed tän kõõjjõʹsse huõlǩâni tõʹst, što måkkam sij nuõrttsääʹmǩiõl da kulttuur tåbddmõõžž tääʹss lij. Tän haʹŋǩǩõʹsse lij vääžnai vuäǯǯad veiddsânji jeeʹresnallšem jurddjid nuʹtt puârast sääʹmǩiõl mainsteei oummuin ǥo še ǩiõl da kulttuur eman mättʼtõõtti leʹbe mättʼtõõttâd haaʹleei säʹmmlain da še nuõrttsääʹmǩiõlin da kulttuurin reâuǥõõtti ämmat-tuâjjlain. Kåččap še jeäʹrrsid vaʹstteed kõõjjõʹsse, jõs tät teemm ǩeäss miõl da seeʹst lie jurddi tän haʹŋǩǩõʹsse.
Kõõjjõõzz teäddcekldõssân lie nuʹtt tåimmʼmõš Lääʹddjânnmest ǥo še raajjid râstldeei õhttsažtuâjj nuõrttsäʹmmlaivuiʹm Lääʹddjânnmest da Taarâst. Kõõjjõõzz puåđõõzzi vieʹǩǩen raajât raamid kåʹdd- da kulttuurstroiʹttli pueʹtti toimmjummša tõi taarbi vuâđald, kook lie vääžnai nuõrttsääʹmǩiõl da kulttuur jeälltummuž diõtt.
Kõõjjõõzz kõõččmõõžžid vaʹsttummuš veekk nuʹt-a 30 minuutt. Kõõjjõs lij anonyym. Vuäitak vaʹstteed lääddas leʹbe säämas. Kööjjös lij äävai vueśsmannu 28.räjja. Späʹsseb vuässõõttmõõžžstad!
Kartt profiilâst: Ville-Riiko Fofonoff