🙆🏻♂️簡介
正式踏入10月，又開始進入一年最適合踩單車既季節。炎夏已經過去，我地亦要繼續我地既「西遊三部曲」。（註：「西遊三部曲」全個旅程由觀塘踩到屯門，預計分三次完成）。5月既時候我地完成左首部曲：出觀塘記（由觀塘 > 紅磡），而家正是進行二部曲既好時機。為左保持連貫，二部曲由上次既終點紅磡碼頭繼續出發，然後會經過九龍西慢慢遊走穿梭到達荃灣西。
今次測試路線既時候，團長有強烈既感覺覺得應該係通宵時候舉辦一場。一來呢個路段最適合係通宵凌晨時候踩，二來我地搞左 10 年從來都未試過踩通宵。再加上剛好遇上 3 日重陽節長假期，所以我地希望善用呢次難得既機會。今次活動預計最大既挑戰會係體力同精神，通宵對呢兩方面有一定要求。但通宵既最大好處就係可以係最少交通壓力下進行。
考慮到今次係通宵活動，如果人數不足，我地將會取消活動，退款比大家。
另外我地亦預計會於稍後推出本次活動既清晨版，預計會清晨時分開始，路線大同小異，但氣氛將會完全不同，有興趣大家可以留意。
🚎路線
為保持連貫，今次我地會係紅磡碼頭出發。由於紅磡海濱唔可以踩單車，我地將會步行經過可以飽覽維港景色既紅磡繞道天橋，到達星光大道。之後我地會沿著海港城的海濱小道向油麻地及奧海城方向前進。再穿過南昌公園之前，我地會係深水埗尋找一個地方稍作休息及食宵夜補充體力。之後便會前往昂船洲大橋，然後再往葵涌既荃灣方向前進，到達荃灣西。
