SOIDADE é un proxecto de exploración interdisciplinar sobre o fenómeno da soidade na sociedade do século XXI, con sesións de deseño colaborativo (coa metodoloxía creativa do Design Thinking) de ideas e propostas de intervención.

Preténdese abordar desde o plano cultural, artístico ou de deseño esta problemática social, mudando o enfoque asistencialista, para permitir unha reinterpretación desde outras ópticas máis creativas e atendendo a outras realidades, convidando para iso a persoas de distintos ámbitos a sesións de traballo creativo.

O vindeiro mércores 18 de decembro celebraremos en Compostela (centro cívico do Ensanche, na rúa Frei Rosendo Salvado, 14-16) unha destas sesións, que nos permitirá reunir ideas e prototipos que máis adiante se compartirán nun foro en liña aberto e dispoñible na web.

SOIDADE está inspirado en proxectos de participación cidadá e innovación social que se están a desenvolver noutras partes do mundo, onde a participación activa de diferentes colectivos en xornadas de deseño permite unha visión máis ampla e unha exploración de solucións máis innovadoras.

Promovido por Xeneme Intervención Social, conta co apoio de BenCuriosa e co patrocinio da Deputación da Coruña neste 2019. Trátase da continuación dun proxecto de innovación social nacido no CoLab, laboratorio de innovación cidadá da Coruña en 2017.

Para participar só é preciso achegarse coa mente aberta e con ganas de compartir ideas arredor desta temática.